ივ. ჯავახიშვილის სახელობის თბილისის სახელმწიფო უნივერსიტეტის ლექსიკოგრაფიულ ცენტრში თინათინ მარგალიტაძის საერთო რედაქტორობით შეიქმნა ახალი ინგლისურ-ქართულ ონლაინ ლექსიკონი.
მისი მისამართია http://www.dictionary.ge/

ეს ინგლისურ-ქართული ონლაინ ლექსიკონი უპირველეს ყოვლისა განკუთვნილია ინგლისური ენის სპეციალისტებისათვის, პედაგოგებისათვის, მთარგმნელებისათვის, სხვადასხვა დარგის სპეციალისტებისათვის, რომელთაც დარგობრივ ტექსტებთან უხდებათ მუშაობა; ლექსიკონი ასევე განკუთვნილია სტუდენტებისათვის, ზოგადად ინგლისური ენის შემსწავლელთათვის, ასევე ინგლისური ენით დაინტერესებული პირებისათვის. ლექსიკონი გარკვეულ სამსახურს გაუწევს ქართული ენით დაინტერესებულ უცხოელებსაც.

სხვა ონლაინ ლექსიკონებისაგან იგი განსხვავდება არა მხოლოდ იმით, რომ მასში 100 000-მდე სიტყვა-სტატია, არამედ იმითაც, რომ ეს ნამდვილი აკადემიური გამოცემაა, მასზე მუდმივ მუშაობას განაგრძობს ძლიერი სპეციალისტების გუნდი. ლექსიკონზე მუშაობა დაუსრულებელი პროცესია. ენა მუდმივად იცვლება მასზე მოლაპარაკე საზოგადოების ცვლილების კვალდაკვალ.

ლექსიკონში დიდი რაოდენობითაა წარმოდგენილი სამეცნიერო-ტექნიკური, ასევე ეკონომიკური, ხელოვნების თუ სხვა სფეროებთან დაკავშირებული ტერმინოლოგია - ლექსიკონში შესული მთლიანი მასალა 800 000-მდე ერთეულს აღწევს.

ონლაინ ლექსიკონს საფუძვლად დაედო ამავე რედაქციის მიერ გამოცემული დიდი ინგლისურ-ქართული ლექსიკონის ტომები. აღნიშნული ტომების გამოცემა დაიწყო 1995 წელს და დღეისათვის გამოქვეყნებულია ლექსიკონის 13 ტომი (ასოები A – O). ონლაინ ვერსიაში ასევე შევიდა ის ასოები (P – Z), რომლებიც ჯერ ტომების სახით არ გამოქვეყნებულა.