„ლიტერატურული გაზეთი“, №53, 1–14 ივლისი 2011, გვ. 16
ლალი ავალიანი

    ეროვნული სამეცნიერო ბიბლიოთეკის  ძალისხმევით, გამოქვეყნდა ბიბლიოგრაფია მრავალწლიანი, სკრუპულოზური შრომის შედეგი – "ჟურნალ "ცისკრის“ ანალიტიკური ბიბლიოგრაფია, 1957–1997“, თბილისი, 2010.
    ნამდვილად არ ვართ განებივრებული ბიბლიოგრაფიული გამოცემებით, დიდი ხანია, ასეთი მასშტაბური პროექტი არ განხორციელებულა. მით უმეტეს, უღრმესი მადლობის ღირსია ამ ექვსას გვერდიანი, მაღალ პოლიგრაფიულ დონეზე გამოცემული წიგნის ყველა მესვეური – ეროვნული სამეცნიერო ბიბლიოთეკის დირექტორი ირაკლი ღარიბაშვილი, შემდგენლები მეგი ბარკავა და ნუნუ აბუაშვილი, ბიბლიოგრაფიული რედაქტორი ია დუდუჩავა.
    ანოტაციაში ვკითხულობთ: ჟურნალ ,,ცისკრის“ ანალიტიკური ბიბლიოგრაფია მოიცავს 1957–1997 წლების მასალას. ნაშრომი შედგება ორი ნაწილისაგან: ძირითადი და ,,ნაირ–ნაირი“ (უცხოეთის ქრონიკა). ბიბლიოგრაფია სისტემატიზირებულია უნივერსალური ათწილადი კლასიფიკაციის მიხედვით. ძირითადი ნაწილის ლიტერატურულ განყოფილებაში მასალის სიმრავლის გამო რუბრიკები დეტალიზებულია. ძირითად ნაწილს და ,,ნაირ–ნაირს“ ცალ–ცალკე ახლავს სახელთა საძიებელი.
    ბიბლიოგრაფია განკუთვნილია საზოგადოების ფართო წრისათვის.
ბარემ აქვე შევნიშნავ, რომ ეროვნული სამეცნიერო ბიბლიოთეკის ძველი სერია – ,,ქართველი მეცნიერები. ბიო–ბიბლიოგრაფიული საძიებელი“, რომლის 97 ნაკვეთია დასტამბული, დღემდე შეუფერხებლად გამოდის: 2010 წელს გამოიცა ,,გიორგი ჩიტაია“ და ,,ექვთიმე თაყაიშვილი“.